မိတ္ထီလာမြို့နယ်၌ မြစိမ်းရောင်ကျေးရွာစီမံကိန်းနှင့်အသက်မွေးဝမ်းကျောင်းအထောက်အကူပြုသင်တန်းများ သုံးသပ်ဆွေးနွေးပွဲ ကျင်းပ
မိတ္ထီလာ ဧပြီ ၄ ရက်
မန္တလေးတိုင်းဒေသကြီး မိတ္ထီလာခရိုင် မိတ္ထီလာမြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာနက မြို့နယ်အဆင့်မြစိမ်းရောင်ကျေးရွာစီမံကိန်းနှင့်အသက်မွေးဝမ်းကျောင်းအထောက်အကူပြုသင်တန်းများ သုံးသပ်ဆွေးနွေးပွဲကို ဧပြီ ၃ ရက်နေ့ နံနက်ပိုင်းက ခရိုင်ကျေးလက်ဒေသဖွံ့ဖြိုးတိုးတက်ရေးဦးစီးဌာနရုံး အစည်းအဝေးခန်းမအတွင်း၌ ကျင်းပပြုလုပ်ခဲ့ကြောင်း သိရသည်။
ထို့နောက် တက်ရောက်လာကြသည့် ကျေးရွာကော်မတီဝင်များက အုပ်စုများဖွဲ့၍ ဆွေးနွေးအကြံပြုတင်ပြကြရာ မြို့နယ်စီမံကိန်းလုပ်ငန်းအဖွဲ့ဝင်များနှင့်မြို့နယ်စီမံကိန်းတာဝန်ခံဝန်ထမ်းများက ဆွေးနွေးအကြံပြုတင်ပြချက်များအပေါ် ပြန်လည်ရှင်းလင်းဆွေးနွေးကြသည်။
ဆက်လက်၍ မိတ္ထီလာမြို့နယ်အတွင်းရှိ မြစိမ်းရောင်ကျေးရွာစီမံကိန်း ယူနစ်(၄၅)ယူနစ်မှ စီမံကိန်းအား အောင်မြင်အောင် တက်တက်ကြွကြွအကောင်အထည်ဖော်ဆောင်ရွက်ခဲ့သည့် အကောင်းဆုံးကျေးရွာယူနစ်(၃)ယူနစ်အား သက်ဆိုင်ရာတာဝန်ရှိသူများက ဆုများအသီးသီးချီးမြှင့်ပေးအပ်သည်။
