မိတ္ထီလာမြို့နယ် ကျေးလက်ရေရရှိလုပ်ငန်းများဆောင်ရွက်နေမှု ကွင်းဆင်းစစ်ဆေး
မန္တလေး အောက်တိုဘာ ၁၁
မန္တလေးတိုင်းဒေသကြီး မိတ္ထီလာခရိုင် မိတ္ထီလာမြို့နယ် ကျေးလက်ဒေသဖွံ့ဖြိုးတိုးတက်ရေး
ဦးစီး ဌာနမှ ၂၀၂၃-၂၀၂၄ခု၊ ဘဏ္ဍာရေးနှစ် ပြည်ထောင်စု(မွမ်းမံ)ရန်ပုံငွေဖြင့် မကျီးတန်းကျေးရွာ မြေသားရေကန်ခြံစည်းရိုးကာရံခြင်းနှင့်လက်နှိပ်တုံကင်တပ်ဆင်ခြင်းလုပ်ငန်းများဆောင်ရွက်နေမှုကို အောက်တိုဘာ ၃ ရက်တွင် တာဝန်ရှိသူများ ကွင်းဆင်းစစ်ဆေးသည်။
ထိုသို့ကွင်းဆင်းစစ်ဆေးခဲ့ရာတွင် မိတ္ထီလာခရိုင်ကျေးလက်ဒေသဖွံ့ဖြိုးတိုးတက်ရေးဦးစီး ဌာန ခရိုင်ဦးစီးမှုး ဒေါ်မြင့်ဝင်း၊ မိတ္ထီလာမြို့နယ်ကျေးလက်ဒေသဖွံ့ဖြိုးတိုးတက်ရေးဦးစီး ဌာန မြို့နယ်ဦးစီးမှူး ဦးချမ်းငြိမ်းဝင်းနှင့် အင်ဂျင်နီယာဝန်ထမ်းများက မကျီးတန်းကျေးရွာ မြေသား ရေကန်ခြံစည်းရိုးကာရံခြင်းဆောင်ရွက်နေမှုအခြေအနေများကို ကြည့်ရှုစစ်ဆေးပြီးနောက် ခရိုင်ဦးစီးမှူး က ရပ်မိရပ်ဖများ၊ ကျေးရွာတာဝန်ရှိသူများ၊ ကျေးရွာကော်မတီဝင်များနှင့် တွေ့ဆုံပြီး လုပ်ငန်း ဆောင်ရွက်ပြီးစီးပြီး ဖြစ်၍ ကျေးရွာရေကော်မတီမှ ထိန်းသိမ်းဆောင်ရွက်ပေးရန် ပြောကြားသည်။
မိတ္ထီလာမြို့နယ် မကျီးတန်းကျေးရွာ၌ ပြည်ထောင်စု(မွမ်းမံ)ရန်ပုံငွေ ခွင့်ပြုငွေကျပ် ၇ ဒသမ ၇၇သန်း အသုံးပြုပြီး မြေသားရေကန်ခြံစည်းရိုးကာရံခြင်း(၁၀၂၀’)၊ လက်နှိပ်တုံကင်(၂)စုံ တပ်ဆင် ခြင်းလုပ်ငန်းများကို ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ တာဝန်ယူ၍ ဇူလိုင်လ (၁၉) ရက်မှ စတင်ဆောင်ရွက်ခဲ့ရာ စက်တင်ဘာ ၂၅ ရက်တွင် လုပ်ငန်းများ ဆောင်ရွက်ပြီးစီးပြီ ဖြစ်ကြောင်း သိရသည်။ အဆိုပါလုပ်ငန်းများ ရာနှုန်းပြည့် ဆောင်ရွက်ပြီးစီးသွားသည့် အတွက် ကျေးရွာရှိအိမ်ခြေ ၆၁ အိမ်မှ လူဦးရေ ၃၁၇ ဦး အတွက် သောက်သုံးရေ ဖူလုံမည် ဖြစ်ကြောင်းသိရသည်။
